I refudums e lis normis di riferiment

Ognidun di nô al pues jessi protagonist inte difese dal ambient là che o vivìn: al baste (ancje se al è un pôc impegnatîf…) fâ atenzion a dute une schirie di azions de nestre cuotidianitât che pal solit ur din pocje impuartance ma che a puedin contribuî al benstâ di ducj.
Cjapant ispirazion di chest concet sempliç, intal 1997 al è jentrât in vore il decret Ronchi: chest decret, che al recepìs une serie di diretivis europeanis in materie ambientâl, al dissipline par dut il teritori talian la gjestion dai refudums.
 

Par risolvi il probleme dai refudums il decret al met jù une serie di intervents che a àn tant che fin principâl chel di contignî la produzion dai refudums; l'obietîf al è chel di intercetâ il plui pussibil lis frazions che si puedin destinâ al recupar e al ricicli, mandant cussì ai termovalorizadôrs e po al smaltiment in discjarie dome lis frazions che no si puedin tornâ a inserî intal cicli produtîf.

Su la fonde dal decret Ronchi, la Provincie di Gurize intal rispiet di ce che al è stât decidût in materie di bande de Regjon, e à definît il so program atuatîf pe gjestion dai refudums.

Tignint cont de situazion dai implants pe gjestion dal refudums presints sul teritori dal Friûl orientâl, i obietîfs strategjics individuâts de Provincie di Gurize a son chescj:

• ridusi la produzion dai refudums;
• creâ un sisteme provinciâl (ancje cun colaborazions interprovinciâls), bon di sodisfâ i principis di autosuficience rispiet ae produzion e di complementaritât tra i varis implants di recupar e di smaltiment;
• inviâ la racuelte diferenziade cul sisteme domiciliâr “puarte par puarte” par miorâ lis prestazions percentuâls.